Klubet shqiptare kanë histori mjaft të hidhura me gjyqet në FIFA apo gjykatat sportive ndërkombëtare ndër vite dhe për këtë mjafton të kujtojmë rastet e fundit kur Tirana, Partizani, Skënderbeu apo edhe të tjerë janë penalizuar financiarisht apo edhe me bllokimin e merkatos.

Mosnjohja e mirë e rregulloreve të qeverive europiane e botërore të futbollit, kryesisht në lidhje me rregullat e transferimit, ka shkaktuar edhe humbjen e gjyqeve të shumta të klubeve shqiptare, që janë detyruar të paguajnë fatura “të kripura”.

Por duket se këtë “mallkim” e ka thyer klubi i Laçit, që pak ditë më parë ka fituar një gjyq ndaj klubit azer FK Gabala.

Klubi kurbinas ka bërë një padi në Dhomën e Zgjidhjes së Konflikteve të FIFA-s për një parregullsi në lidhje me transferimin e sulmuesit Segun James Adeniyi.

Pasi mori në shqyrtim çështjen, organi juridik i qeverisë së futbollit botëror vendosi t’i japë të drejtë klubit shqiptar dhe t’i kërkojë FK Gabalas shlyerjen e detyrimeve brenda 45 ditëve.

Bëhet fjalë një shifër modeste (rreth 2300 euro), por gjithsesi precedenti pozitiv është një lajm mjaft i mirë.

Kjo konfirmon faktin se kur klubet punojnë mirë dhe janë korrektë në përpilimin e më pas zbatimin e kontratave me lojtarë apo klube të huaja, nuk rrezikojnë të përballen me penalitete, që në vitet e fundit kanë qenë të shumta në fakt.

Rasti i Laçit duhet marrë shembull nga të gjitha klubet shqiptare për mënyrën e administrimit.

Ja përmbajtja e vendimit:

Vendimin i Nënkomisionit të Dhomës së Zgjidhjes së Konflikteve të FIFA-s për çështjen Ref. Nr. TMS 6438, që i përket KF Laçi kundër FK Gabala në lidhje me transferimin e lojtarit Segun James Adeniyi.

Nëpërmjet këtij vendimi është vendosur:

Pranimin e padisë së Paditësit KF Laçi.

Detyrimin e të Paditurit FK Gabala, t’i paguajë Paditësit:

– 2,005 Euro kontribute solidariteti plus 5% interesa në vit deri në datën e kryerjes së pagesës si më poshtë:

– për shumën 1,002.5 Euro që nga 31 gusht 2018;

– për shumën 501.25 Euro që nga 3 mars 2019;

– për shumën 501.25 Euro që nga 31 gusht 2019.

Paditësi duhet t’i njoftojë menjëherë të Paditurit numrin e llogarisë bankare, në të cilën i Padituri duhet të kryejë pagesën.

I Padituri duhet të vërtetojë kryerjen e pagesës në postën elektronike në adresën psdfifa@fifa.org.

Në rast se shuma objekt detyrimi, (përfshirë të gjithë interesin e zbatueshëm) nuk paguhet nga i Padituri brenda 45 ditëve, nga njoftimi i numrit të llogarisë bankare nga ana e Paditësit, do të lindin pasojat e mëposhtme:

Të Paditurit do t’i ndalohet regjistrimi i lojtarëve të rinj si në nivel kombëtar ashtu dhe në nivel ndërkombëtar për 3 sezone transferimi të njëpasnjëshme.

Ndalimi do të hiqet menjëherë, pas konfirmimit që shuma e duhur (përfshirë të gjithë interesin e zbatueshëm) është marrë nga Paditësi.

Në rast të mos pagimit në kohë, çështja do t’i përcillet Komisionit të Disiplinës në FIFA për vendimmarrje.

Palët nuk kanë kosto procedurale.