Arrestohet një i ri në Pikën Kufitare të Qafë Prushit. 23-vjeçari tentoi të kalojë kufirin, ndërsa na bagazhin e mjetit të tij tip “Benz” kishte fshehur një të mitur, 17-vjeçare.
Në hyrje të RSH, shërbimet e Policisë Kufitare kanë kaluar në vijë të dytë për kontroll më të imtësishëm, automjetin tip “Benz”, me drejtues D. LL. dhe pasagjer një 17-vjeçar.
Gjatë kontrollit në bagazhin e automjetit, u gjet e fshehur një shtetase e mitur 17 vjeçe, e cila tentonte të kalonte kufirin në mënyrë të paligjshme, përmes ndihmës (transportimit) të dhënë nga D. LL. dhe 17-vjeçari.
Në përfundim të veprimeve procedurale, specialistët për Hetimin e Krimeve në DVP Kukës arrestuan në flagrancë D. LL., 23 vjeç, rezident në Londër, si dhe proceduan në gjendje të lirë 17-vjeçarin, banues në Kosovë, për veprën penale “Ndihma për kalim të paligjshëm të kufirit” dhe shtetasen e mitur për veprën penale “Kalimi i paligjshëm i kufirit shtetëror”.
Materialet i kaluan Prokurorisë pranë Gjykatës së Rrethit Gjyqësor Kukës, për veprime të mëtejshme.
